DHANA YA UJASIRIAMALI

MAANA YA UJASIRIAMALI

Dhana ya Ujasiriamali ina maana pana , miongoni mwa hizo ni; Mjasiriamali ni mtu ambaye ana hamasa kubwa ya kuleta mabadiliko chanya katika hali yake ya kiuchumi ambaye ana tabia za kipekee ili kufanikisha azma yake hiyo kwa kujishuhulisha (yaani kujiajiri) ili awe na hali nzuri zaidi kiuchumi.

Pia katika hali nyingine Mjasiriamali anaweza kuwa mtu yoyote ambaye anajishughulisha mwenyewe(amejiajiri) katika sekta fulani mfano: kilimo, ufugaji au biashara.

Neno Ujasiriamali lina asili ya Kifaransa " Entreprendre" sawa na Kutekeleza/Kufanya shughuli fulani mwenyewe katika uwanja wa kibiashara katika maana rahisi ni sawa na kuanzisha biashara/shughuli ya kujiajiri.

Kwa mitazamo mbalimbali ya wasomi wana muelezea Mjasiriamali kama mtu ANAYEONGOZA, ANAYEPANGA na ALIYE NA UTAYARI juu ya hatari zozote zinazoweza kujitokeza katika biashara/shughuli yake husika.  Vilevile ni mtu anayechukua hatua pindi fursa itokeapo.

Mchumi wa KiAustrian Joseph Schumpeter ameielezea dhana ya ujasiriamali kwa kuegemea mihimili ya UGUNDUZI na UBUNIFU, katika nyanja hizi(yaani kugundua na kubuni):-

• Bidhaa Mpya
• Njia Mpya za uzalishaji/uendeshaji.
• Masoko Mapya
• Mifumo mipya ya Vikundi na Mashirikisho

UTAJIRI unapatikana pindi UGUNDUZI unapoenda sambamba na MAHITAJI, kwa mtazamo huu tunaweza kusema ya kwamba kazi ya Mjasiriamali ni sawa na kuunganisha mbegu za vigezo fulani katika hali ya Ugunduzi na Ubunifu ili kutengeneza ubora na thamani kwa mteja kwa imani ya kwamba thamani itakayopatikana itafidia gharama za mbegu hizo, na hatimaye kutengeneza faida ya kutosha inayopelekea UTAJIRI.

Mpaka hapa tumeweza kumfahamu huyu Mjasiriamali kwa maana na Mitazamo michache. Je kila Mfanya biashara ndogo ndogo ni Mjasiriamali? Tathmini hili kabla hujasoma Article nyingine!

Historia ya ujasiriamali Tanzania

Baada ya uhuru (1961) Serikali ya Tanzania iliamua kufuata sera ya uchumi hodhi, sera ambayo serikali inamiliki njia kuu za uzalishaji. Haukuwa ruhusa kwa mtu mmoja mmoja hasa viongozi kumiliki biashara. Sera hii iliimarishwa wakati wa azimio la Arusha.

Kutokana na utandawazi kuenea duniani, mfumo wa sera ya kibepari ulichukua nafasi kubwa duniani. Mfumo wa kibepari unasisitiza watu binafsi kumiliki na kuendesha biashara, serikali jukumu lake ni kupanga sera na kuisimamia.  Mwishoni mwa miaka ya 1980 Tanzania ililazimika kuiga sera ya kibepari kutokana na masharti ya Benki Kuu ya Dunia  ( World Bank)  na Shirika la Fedha Duniani ( IMF).

Ni kipindi cha uongozi ( utawala) wa awamu ya tatu, dhana ya ujasiriamali ilishika kasi sana. Viongozi wa serikali na wa jamii kwa ujumla walisisitiza watu kujiingiza katika ujasiriamali kwa maana ya kuanzisha na kuendesha biashara. Serikali kwa asilimia kubwa ikajiatoa katika uzalishaji. Makampuni binafsi yalishika kasi kubwa.

SEKTA ZA UCHUMI

 Kuna sekta ya umma na sekta binafsi. Kuhusu sekta ya umma ni kwamba serikali ni mzalishaji na msimamizi, mkazo mkubwa ni watu kusoma na baada ya kisoma ni kuajiriwa.  Dhana ya sekta binafsi inahusu watu binafsi kumiliki biashara ( Kujiari).

Karne hii lengo la kusoma shule si kuajiriwa baada ya kumaliza kisoma, lengo kuu ni kujiajiri.  Ni muhimu watu kutafuta maarifa na ujuzi katika mambo mbalimbali kwa njia mbalimbali mfano semina,  internet na vyombo vya habari n.k